HIGIT 100 na ang namatay habang higit 600 ang sugatan sa magnitude 7.0 na lindol na tumama sa Sichuan province sa China.
Agad na ipinag-utos ni Chinese President Xi Jinping ang all-out rescue effort kasunod ng malakas na lindol upang ma-minimize ang bilang ng kaswalidad.
Nag-deploy agad ng 2,000 sundalo ang China para sa rescue operation sa mga apektadong lugar.
Sa report, pinaka-apektado ng lindol ang bayan ng Ya’an na may 1.53 milyong populasyon at tinaguriang hometown ng giant panda sa China.
Kinansela rin ang mga biyahe sa Chengdu Shuangliu Airport at ang 82 tren.
Dakong alas-8:02 (oras doon) nang maganap ang lindol.
Naitala ang epicenter nito sa 140 kilometers mula sa Chengdu City na may lalim na 13 km.
Nasukat naman ng US Geological Survey ang lindol sa magnitude 6.6.
Inaasahan na tataas pa ang bilang ng mga namatay.