PINUGUTAN ng ulo ang isang ginang ng mismong anak nito sa Brgy. Bonbon, Lambunao, Iloilo.
Kinilala ang biktima na si Erlinda Liderato, 65, habang itinago naman ng pamilya ang pangalan ng suspek.
Ayon kay Punong Brgy. Rolando Araceli, may dinaranas na nervous breakdown ang suspek kaya’t nagawa nitong pugutan ng ulo ang kanyang ina.
Natagpuan ang bangkay ng ina sa labas ng kanilang bahay kung saan nakapatong pa sa katawan nito ang kanyang pugot na ulo.
Nabatid na unang tinaga ng suspek ang balikat ng biktima ngunit hindi ito napuruhan at nakalabas pa ng bahay upang humingi ng tulong kaya nang maabutan nito ang ina ay tinuluyan nang pugutan ng ulo.
Nang dumating ang kapatid na babae ng suspek, narinig pa nito ang tunog ng patalim na hawak ng kanyang kapatid at nang makitang may dugo sa shorts nito, humingi na ito ng tulong sa kanilang barangay officials at doon na natagpuan ang bangkay ng kanilang ina.
Ayon sa punong barangay, bago nagka-nervous breakdown, mabait at masunuring anak ang suspek kung saan nagtrabaho pa ito sa labas ng bansa at ipinagawa ang kanilang bahay.
Kasalukuyang nakakulong ang suspek sa kanilang kubo habang inihahanda ang pagdadala rito sa mental hospital.
The post Ina pinugutan ng anak sa Iloilo appeared first on Remate.