ISANG sundalo ang namatay habang walo ang nasugatan makaraang magkasagupa ang Philippine Military at Abu Sayyaf na nagsimula kaninang madaling-araw sa Basilan, Agosto 8.
Ayon kay Colonel Carlito Galvez ng 104th Brigade sa Basilan, nagsimula ang labanan ng mga sundalo sa 70 miyembro ng ASG bandang alas-4:00 ng madaling-araw na tumagal hanggang alas-10:00 ng umaga sa Sitio Bohe Libi, Al Barka.
Nabatid din sa intelligence reports, may pitong namatay sa panig ng extremist group na pinamumunuan ng isang Isnilon Hapilon.
Bunsod nito, 1,000 pamilya ang inilikas upang hindi madamay sa naturang operasyon.
Sumugod ang mga sundalo sa lugar na tinatawag na Buni-Buni matapos makatanggap ng impormasyong doon nagpupulong ang mga lider ng ASG na sina Isnilon Hapilon, Puruji Indama at Khair Mundos.
Batay pa rin sa intelligence information, maghahasik ng gulo sa Basilan ang ASG matapos ang Ramadan.
Nakubkob na rin ng mga sundalo ang kuta, pero hindi pa matukoy ang bilang ng nasugatan o nasawi sa panig ng ASG.
The post Militar vs ASG: 1 patay, 8 sugatan appeared first on Remate.