PINAGLALAMAYAN na ngayon ang isang lalaki matapos pagtatagain ng mister ng kanyang kabit sa Quezon province kaninang umaga (Marso 10).
Hindi na umabot nang buhay sa pagamutan sanhi ng taga sa ulo at sa iba’t ibang parte ng katawan ang biktimang si Ramon Hong III, 33, ng Sitio Salvacion, Bgy. Buenesco, Gumaca, Quezon.
Hinahanting na ngayon ng Gumaca PNP para panagutin sa krimen ang suspek na sadyang hindi pinangalanan.
Sa ulat, naganap ang insidente dakong 8:45 ng umaga sa tapat ng bahay ng biktima.
Bago ito, nabisto ng suspek ang mga mensahe sa cellphone ng kanyang ka-live-in at ng biktima kaya kinompronta nito ang babae.
Itinanggi naman ito ng ginang pero hindi naniwala ang suspek kaya sinugod nito ang bahay ni Hong.
Paglabas naman ni Hong sa kanyang bahay, agad itong pinagtataga ng suspek na pumutol sa ilang daliri ng biktima. ROBERT TICZON